Martın 9-da səhər saatlarında Bakı – Sumqayıt yolunda Masazır qəsəbəsinə girişin yanındakı körpüdə baş verən yol nəqliyyat hadisəsi zamanı Sumqayıt Dövlət Universitetinin tələbələrini daşıyan “Ford Tranzit”markalı avtobus yük avtomobili ilə toqquşub, nəticədə Fizika və elektroenergetika fakültəsinin III kurs tələbələri İbrahim Quliyev, İbrahim Nəsibov, Tarix və coğrafiya fakültəsinin III kurs tələbələri Çinarə Quliyeva, Rəşad Caniyev, Roza Muradova faciəvi şəkildə dünyasını dəyişiblər. Dünən Sumqayıt Dövlət Universitetinin rektoru professor Elxan Hüseynov, prorektorlar, dekanlar, rəhbər işçiləri və tələbələr avtoqəzada faciəvi şəkildə həyatını itirmiş tələbələrimizin yas mərasimlərində iştirak edərək onların ailələrinə və yaxınlarına dərin hüznlə başsağlığı veriblər. Bu gün daha iki nəfər tələbəmiz torpağa tapşırılır, universitetin rəhbərliyi və kollektivi dəfn mərasimində iştirak edirlər.
Mətbuat xidməti