Tariximiz
Ulu Öndər Heydər Əliyevin “Azərbaycan Respublikasında təhsil sisteminin təkmilləşdirilməsi haqqında” 13 iyun 2000-ci il tarixli Fərmanı ilə Azərbaycan Sənaye İnstitutunun bazasında yaradılmış Sumqayıt Dövlət Universitetinin tarixini və onun inkişaf mərhələlərini, bu günü və gələcək perspektivlərini özünəməxsus keyfiyyətlərlə səciyyələndirmək mümkündür.
Təməli 1962-ci ildə qoyulmuş Sumqayıt Dövlət Universiteti qabaqcıl beynəlxalq təcrübədən, milli təhsil sisteminin uğurlarından və özünün 70 illik zəngin ənənələrindən bəhrələnməklə bu gün uğurlu addımlar atır.
2015-ci ildə Azərbaycan Müəllimlər İnstitutunun bəzi filialları ləğv edildikdən sonra Sumqayıt və Salyan filiallarının tələbələri Sumqayıt Dövlət Universitetinin tələbələri sırasına daxil edilmiş, filialların müəllim və texniki heyəti müsabiqə yolu ilə universitetdə işlə təmin olunmuşdur.
Universitet 2007-2008-ci tədris ilindən kreditli təhsil sisteminə keçmişdir və təhsilin hər iki səviyyəsində tədris kredit sistemi ilə həyata keçirilir. Bu sistem qiyabi təhsildə də uğurla tətbiq olunur.
Hazırda Sumqayıt Dövlət Universitetində 7 fakültə (Riyaziyyat, Fizika və elektroenergetika, Mühəndislik, Kimya və biologiya, Tarix və coğrafiya, İqtisadiyyat və idarəetmə, Filologiya), 29 kafedra, 6 Elmi-tədqiqat laboratoriyası, Tədris Metodiki Mərkəz, Doktorantura və magistratura şöbəsi, Elmi hissə, Beynəlxalq əməkdaşlıq və əcnəbi tələbələr şöbəsi və digər qurumlar fəaliyyət göstərir. Universitetdə fəlsəfə və elmlər doktoru proqramları üzrə mütəxəssis hazırlığı aparılır.
Eyni zamanda Universitetin nəzdində Sumqayıt Dövlət Texniki Kolleci fəaliyyət göstərir.
2014-cü ildən isə Sumqayıt Dövlət Universiteti Xəzəryanı ölkələrin Dövlət Universitetləri Assosiasiyasının və 2015-ci ildən isə Azərbaycan-Rusiya Universitetləri Assosiasiyasının üzvüdür.