Sumqayıt Dövlət Universitetinin (SDU) nümayəndə heyəti noyabrın 26-da Özbəkistana səfər çərçivəsində Daşkənd şəhərində yerləşən Mirzə Uluqbəy adına Özbəkistan Milli Universitetini ziyarət edib. Universitetin rəhbər şəxslərinin iştirakı ilə keçirilən görüşdə Sumqayıt Dövlət Universitetinin rektoru v.i.e., AMEA-nın müxbir üzvü, professor Əminağa Sadıqov ölkələrimiz arasında mövcud olan əməkdaşlığın elm və təhsil sahəsində də uğurla davam etdirildiyini və bu əməkdaşlığın universitetlərimiz üçün yeni perspektivlər açdığını vurğulayıb. O, SDU-nun tarixi, infrastrukturu, mövcud tədris imkanları, yaşıl kampusu, dayanıqlı inkişaf məqsədləri istiqamətində həyata keçirilən fəaliyyətlər və universitetin beynəlxalq reytinq göstəriciləri barədə geniş məlumat verib. Həmçinin ikitərəfli tərəfdaşlığın universitetlər üçün yaratdığı imkan və üstünlüklərin əhəmiyyətini vurğulayıb. Özbəkistan Milli Universitetinin rəhbərliyi öz növbəsində SDU nümayəndə heyətinə ziyarətə görə təşəkkürünü bildirib. Bu əməkdaşlığın müəllim və tələbə mübadiləsi, birgə elmi tədqiqatlar və layihələrin icrasına mühüm töhfə verəcəyini qeyd edib. Sonra universitetlər arasında ikitərəfli əməkdaşlıq memorandumu imzalanıb.