Əminağa Sadıqovdan, Sumqayıt, Azərbaycan
Möhtərəm cənab Prezident, Müzəffər Ali Baş Komandan,
Son beş il ərzində bütün dünya azərbaycanlıları kimi biz də Sizin rəhbərliyinizlə əldə olunan möhtəşəm qələbələrin və diplomatik uğurların sevincini yaşayırıq.
Vaşinqtonda Amerika Birləşmiş Ştatlarının Prezidenti ilə ikitərəfli, həmçinin Ermənistan Baş nazirinin iştirak etdiyi üçtərəfli görüşlərinizin uğurlu nəticələri münasibətilə Sizi ürəkdən təbrik edirik və Sizə dərin minnətdarlığımızı bildiririk.
ABŞ Prezidenti ilə tarixi əhəmiyyət daşıyan görüşünüzdə Azərbaycan Respublikası və Amerika Birləşmiş Ştatları arasında strateji tərəfdaşlığa dair Anlaşma Memorandumunun imzalanması Azərbaycanın milli maraqlarının müdafiəsi, Cənubi Qafqazda sülh və təhlükəsizliyin təmin edilməsi, eyni zamanda beynəlxalq əməkdaşlığın möhkəmləndirilməsi baxımından çox mühüm hadisədir. Sizin prinsipial mövqeyiniz, uzaqgörən siyasətiniz və qətiyyətli liderliyiniz sayəsində Azərbaycan beynəlxalq münasibətlər sistemində mühüm söz sahibinə çevrilmişdir. Bu görüş Azərbaycan-ABŞ münasibətlərinin strateji xarakterini təsdiqləməklə yanaşı, ölkəmizin regional sabitlik və təhlükəsizlik proseslərində aparıcı rolunu təsdiq etdi. Sizin diplomatik təşəbbüsləriniz nəticəsində Azərbaycan beynəlxalq aləmdə etibarlı tərəfdaş, regional güc mərkəzi və dayanıqlı inkişaf modeli kimi tanınır.
Cənab Prezident, ABŞ ilə qurduğunuz yüksək səviyyəli siyasi dialoq, əməkdaşlıq və qarşılıqlı etimad münasibətləri ölkəmizin iqtisadi inkişafı, enerji təhlükəsizliyi, müdafiə qabiliyyətinin gücləndirilməsi və beynəlxalq nüfuzunun artırılmasına əvəzsiz töhfə verəcəkdir.
Biz bu görüşü həm də Azərbaycan-Ermənistan münasibətlərində yeni imkanların formalaşmasına, regionda uzunmüddətli sabitlik və davamlı sülhün bərqərar olunmasına şərait yaradan mühüm diplomatik nailiyyət kimi qiymətləndiririk.
Ağ Evdə Azərbaycan və Ermənistan arasında sülh sazişi ilə bağlı Birgə Bəyannamənin imzalanması mühüm tarixi hadisə kimi regionda sabitliyin, qarşılıqlı etimadın və uzunmüddətli əməkdaşlığın möhkəmlənməsinə xidmət edir, gələcək nəsillərə firavan və təhlükəsiz həyatın təminatını yaradır. Bu Sizin Ali Baş Komandan kimi hərbi zəfərinizin diplomatik yekunudur.
Sizin uğurlu siyasətiniz nəticəsində Azərbaycanın beynəlxalq mövqeləri möhkəmlənir, xalqımızın milli maraqları isə qətiyyətlə müdafiə olunur. Biz Sizin yorulmaz fəaliyyətinizi və dövlətimizin qorunması naminə göstərdiyiniz səyləri yüksək dəyərləndiririk, Azərbaycan xalqının rifahı, təhlükəsizliyi və inkişafı naminə atdığınız bütün addımları qürurla izləyirik. Sizi əmin edirik ki, Sumqayıt şəhərinin yeganə universitetinin əməkdaşları kimi bundan sonra da ətrafınızda bir yumruq kimi birləşərək apardığınız uğurlu daxili və xarici siyasətə öz əməli fəaliyyətimizlə dəstək verəcəyik.
Möhtərəm cənab Prezident, Sizə möhkəm cansağlığı, uzun ömür, Vətənimizin gələcəyi naminə dövlətçilik fəaliyyətinizdə yeni-yeni uğurlar arzulayırıq. Əminik ki, Sizin rəhbərliyinizlə Azərbaycan daha da qüdrətlənəcək və beynəlxalq aləmdə onun nüfuzu gündən-günə artacaqdır. Sizin adınız, dövlət başçısı və Ali Baş Komandan kimi fəaliyyətiniz Azərbaycanın tarixini həmişə qızıl hərflərlə bəzəyəcək.
Sumqayıt Dövlət Universitetinin professor-müəllim heyəti adından
Dərin hörmətlə,
Əminağa Sadıqov,
Sumqayıt Dövlət Universitetinin rektoru vəzifəsini icra edən,
AMEA-nın müxbir üzvü, professor
Azərbaycan Respublikası, Sumqayıt şəhəri.
