Martın 4-də ADA Universitetində “Azərbaycan və Qazaxıstan arasında ali təhsildə əməkdaşlığın genişləndirilməsinə” həsr olunmuş dəyirmi masa keçirilib. Tədbirdə Qazaxıstan Respublikasının elm və ali təhsil naziri Sayasat Nurbek, Azərbaycanın elm və təhsil naziri Emin Əmrullayev, eləcə də hər iki ölkənin aparıcı universitetlərinin rektorları iştirak ediblər. “Dəyirmi masa” çərçivəsində təşkil edilən “Azərbaycan və Qazaxıstan arasında akademik əməkdaşlığın artırılması” mövzusunda panel müzakirəsində bir sıra vacib mövzular ətrafında fikir mübadiləsi aparılıb. Müzakirələrdə “Azərbaycan və Qazaxıstan arasında ikili diplom proqramları: effektiv tətbiq və təsir strategiyaları”, “Azərbaycan və Qazaxıstan arasında elmi əməkdaşlıq: innovasiya və qlobal tərəfdaşlığın təşviqi” və “Akademik mobilliyin və mədəni əməkdaşlığın artırılması” mövzuları diqqət mərkəzində olub. Azərbaycan və Qazaxıstan arasında ali təhsil sahəsində əməkdaşlığın genişləndirilməsinə həsr olunmuş “dəyirmi masa” çərçivəsində Sumqayıt Dövlət Universiteti(SDU) ilə Qazaxıstanın iki aparıcı ali təhsil müəssisəsi arasında anlaşma memorandumları imzalanıb. Sənədlər Turan Universiteti və Almatı Menecment Universiteti ilə əməkdaşlığı nəzərdə tutur. Qeyd edək ki, müzakirələrdən sonra hər iki ölkədən ümumilikdə 17 universitetin iştirakı ilə 40 qarşılıqlı anlaşma memorandumunun imzalanma mərasimi baş tutub