Dekabrın 28- də Sumqayıt Dövlət Universitetində “Vətənpərvər Maarifçi Gənclər” İctimai Birliyinin təşkilatçılığı ilə “Eko könüllülər: Gənclər təbiət və bəşəriyyət yolunda” adlı tədbir keçirilib. Dövlət Himni səsləndirildikdən sonra tədbiri giriş sözü ilə açan universitetin Sosial məsələlər və ictimaiyyətlə əlaqələr üzrə prorektoru dosent Elmar Xəlilov ekoloji tarazlığın qorunması və ətraf mühitin mühafizəsi sahəsindəki vacib məsələlərdən danışıb. Sonra “Vətənpərvər Maarifçi Gənclər” İctimai Birliyinin layihə rəhbəri Nəsimi Həsənov rəhərlik etdiyi təşkilatın fəaliyyəti barədə məlumat verib. Ölkəmizdə ekoloji problemlərin qarşısının alınması və həlli ilə bağlı atılan konkret addımları nəzərə çatdırıb. SDU-nun Kimya mühəndisliyi və ekologiya kafedrasının dosenti Rəhilə Əhmədova tələbələr arasında ekoloji maarifləndirmə istiqamətində həyata keçirilən tədbirlər və layihələr barədə söz açıb. “Gənclərin Anti-narkomaniya” İctimai Birliyinin sədri, layihə eksperti Billur Məmmədova layihənin mahiyyəti barədə çıxış edib.