AGMA gənc müəllim və tələbələr üçün görüş keçirdi

Dekabrın 19-da Sumqayıt Dövlət Universitetində (SDU) Azərbaycan Gənc Müəllimlər Assosiasiyası (AGMA) tərəfindən gənc müəllim və tələbələr üçün görüş keçirildi. Universitetin Sosial məsələlər və ictimaiyyətlə əlaqələr üzrə prorektoru, dosent Elmar Xəlilov çıxış edərək görüşün əhəmiyyətindən və Azərbaycan Gənc Müəllimlər Assosiasiyası tərəfindən həyata keçirilən layihələrdən bəhs etdi. Gələcəyin müəllimləri olan tələbələrə bu imkanlardan faydalanmağı tövsiyə etdi. Görüş zamanı AGMA-nın sədri Pərvinə Qədimova çıxış edərək gənc müəllim və tələbələrə təşkilatın fəaliyyəti, imkanları, gələcək planları ilə bağlı ətraflı məlumat verdi. O, iştirakçılara müxtəlif layihələrdən, təlimlərdən necə yararlana biləcəkləri barədə danışdı. Görüşün sonunda maraqlı fikir mübadiləsi aparıldı.