Dekabrın 18 –də Sumqayıt Dövlət Universitetində Karyera və Məzunlarla İş Mərkəzinin və İqtisadiyyat və idarəetmə fakültəsinin təşkilatçılığı ilə İqtisadi Araşdırmalar Tədris Mərkəzinin nümayəndələri tərəfindən “Hazır mühasib 5” layihəsi çərçivəsində tələbələrlə görüş keçirildi. Karyera və Məzunlarla İş Mərkəzinin direktoru Nəsibə Əmirbəyova çıxış edərək, görüşün İqtisadiyyat və idarəetmə fakültəsi üzrə təhsil alan tələbələr üçün böyük əhəmiyyət kəsb etdiyini vurğuladı. O, tələbələrin gələcək karyera inkişafları üçün vacib məlumatlar və bacarıqlar əldə etmələrinin önəmini qeyd etdi. İqtisadiyyat və idarəetmə fakültəsinin dekan əvəzi dosent Loğman Abdullayev çıxış edərək tələbələrin müasir iş dünyasının tələblərinə uyğun olaraq formalaşmasının vacibliyini və onlara belə görüşlərin karyera inkişafı baxımından əhəmiyyətli olduğunu bildirdi. Qeyd etdi ki, İqtisadi Araşdırmalar Tədris Mərkəzi tərəfindən tələbələrimiz 5 (beş) ay müddətində ödənişsiz olaraq təlimlərdə iştirak edəcəklər. Sonra İqtisadi Araşdırmalar Tədris Mərkəzinin (İATM) rəhbəri Radil Fətullayev "Karyera planlanması və karyerada uğurun sirləri" mövzusunda çıxış etdi. Tədbirdə İATM-in Karyera Mərkəzinin rəhbəri Nail Mikayılov və Biznesin inkişafı üzrə meneceri Arif İsgəndərov çıxış edərək “Hazır mühasib 5” layihəsi haqqında ətraflı məlumat verdilər. Görüşün sonunda sual-cavab sessiyasında fəal iştirak edən tələbələr İqtisadi Araşdırmalar Tədris Mərkəzi tərəfindən hədiyyələrlə mükafatlandırıldılar.