Dekabrın 13-də Sumqayıt Dövlət Universitetində “İşi mütəxəssislərdən öyrənək” adlı maarifləndirici tədbir keçirildi. Tədbiri rektorun müşaviri İsmayıl İsmayılov açaraq qonaqları və iştirakçıları salamladı, “İşi mütəxəssislərdən öyrənək” adlı layihənin əhəmiyyətindən və layihə çərçivəsində görüləcək işlər barədə məlumat verdi. Diqqətə çatdırdı ki, gələcəkdə bu cür maarifləndirici tədbirlərinin davamlı olması və tələbələrin iş dünyasına inteqrasiyasını daha da asanlaşdırması nəzərdə tutulur. Çünki bu cür tədbirlər tələbələrin öz sahələrindəki bilik və bacarıqlarını praktik olaraq inkişaf etdirmələrinə imkan yaradır və onları gələcək iş mühitinə hazırlayır. Həmçinin qarşılıqlı təcrübə mübadiləsinin təşviq edilməsi baxımından əhəmiyyətli rol oynayır. Tədbirdə “Kimya Mühəndisləri Cəmiyyəti”nin (Society of Chemical Engineers - SChE) üzvləri çıxış edərək, cəmiyyətin fəaliyyəti, təşkil etdiyi təlimlər, forumlar və mühəndislərlə keçirilən görüşlər barədə ətraflı məlumat verildi. Qeyd olundu ki, cəmiyyət yarandığı iki il müddətində bir sıra uğurlu layihələr həyata keçirib. Tədbir zamanı cəmiyyətin fəaliyyəti ilə tanışlıq məqsədilə tanıtım videoçarxı nümayiş olundu. Daha sonra “SOCAR Downstream Management” MMC –nin proses mühəndisi Sənan Süleymanlı “Kimya mühəndisliyi və cəmiyyət”, SOCAR “Azərikimya” İB-nin proses meneceri Samir Səlimli “Kimya mühəndisliyinin sənayedə rolu” mövzularında çıxış edərək öz sahələrindəki ən son yeniliklər, iş praktikaları və gənc kadrların inkişafı ilə bağlı fikirlərini bölüşdülər. Tələbələrə iş mühitində necə uğurlu olmaq, komandada işləmə bacarıqlarını inkişaf etdirmək və digər məsələlər barədə dəyərli tövsiyələrini verdilər. Həmçinin kimya mühəndislərinin sənayenin inkişafında mühüm töhfələr verdiyini və bu sahədəki yeniliklərin əhəmiyyətini diqqətə çatdırdılar. Tədbir zamanı tələbələrin maraqlandıran suallar mütəxəssislər tərəfindən cavablandırıldı. Sual-cavab sessiyasında fərqlənən tələbələrə hədiyyələr təqdim edildi.