Dekabrın 12-də Sumqayıt Dövlət Universitetində (SDU) Tarix və coğrafiya fakültəsinin və Həmkarlar İttifaqı Komitəsinin birgə təşkilatçılığı ilə Ümummilli lider Heydər Əliyevin anım gününə həsr olunmuş “Sən elə bir zirvəsən!” adlı tədbir keçirilib. Əvvəlcə Ümummilli Liderin əziz xatirəsi bir dəqiqəlik sükutla yad edilib. Sonra dahi şəxsiyyətin zəngin fəaliyyətinə dair videoçarx nümayiş olunub. Tədbiri giriş sözü ilə Tarix və coğrafiya fakültəsinin dekanı, professor Adil Baxşəliyev açaraq müasir dövlətçiliyimizin banisi Ümummilli lider Heydər Əliyevin istər sovet dövründə, istərsə də müstəqillik dövründə Azərbaycan tarixində misilsiz xidmətlərindən, ölkənin müstəqilliyini məhv olmaqdan xilas etməsindən, onu möhkəmləndirməsində Azərbaycan xalqı qarşısındakı böyük xidmətlərindən söz açıb. Bildirib ki, Ulu Öndərin Azərbaycana rəhbərlik etdiyi hər iki dövrdə onun zəngin dövlətçilik təcrübəsi və müdrikliyi sayəsində bütün sahələrdə böyük inkişafa və quruculuq işlərinə nail olunub. Professor onu da əlavə edib ki, dahi şəxsiyyətin qurduğu müasir müstəqil Azərbaycan etibarlı əllərdədir. Heydər Əliyevin uğurlu daxili və xarici siyasəti Prezident İlham Əliyev tərəfindən uğurla davam etdirilərək mühüm tarixi nailiyyətlərə və qələbələrə imza atılır. Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə Vətən müharibəsində qazanılan möhtəşəm zəfər nəticəsində 30 ilə yaxın Ermənistanın işğalı altında qalmış doğma torpaqlarımız azad edilib. Bu gün respublikamızın hər yerində Azərbaycanın Dövlət Bayrağı dalğalanır. Adil Baxşəliyev onu da vurğulayıb ki, xalqımızın və dövlətimizin əldə etdiyi bütün uğurların təməlində Heydər Əliyev siyasəti dayanır. Azərbaycan xalqı hər zaman Ulu Öndərini böyük ehtiram, iftixar və minnətdarlıqla xatırlayacaq. Azərbaycan və Şərqi Avropa xalqları tarixi kafedrasının dosenti Əmirxan İsayev “Azərbaycanın dövlətçilik tarixində Heydər Əliyevin rolu”, Fəlsəfə, sosiologiya və politologiya kafedrasının baş müəllimi Zahid Bünyadov “Etnomilli münaqişələrin həllində Heydər Əliyev fenomeni”, fakültənin III kurs tələbəsi Rahil Cəfərov “Heydər Əliyevin gənclər siyasəti” mövzularında çıxış ediblər. Natiqlər Ümummilli Lider Heydər Əliyevin şərəfli həyat və fəaliyyətindən, Azərbaycanın inkişafı üçün həyata keçirdiyi islahatların əhəmiyyətindən, ölkəmizin beynəlxalq aləmdə nüfuzunun yüksəlməsində misilsiz xidmətlərindən bəhs ediblər. Tədbirin sonunda fakültənin II kurs tələbəsi Şəmsiyə Mikayılovanın ifasında “Sən elə bir zirvəsən” şeiri səsləndirilib.