Sumqayıt Dövlət Universiteti (SDU) və "BOLT SERVICES AZ" MMC arasında imzalanan əməkdaşlıq müqaviləsi çərçivəsində “Taksi minik avtomobillərinin sürücüləri üçün etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlıq keçmələri üzrə Proqram”a uyğun olaraq təlimlərə start verilib. Taksi minik avtomobili sürücülərinin iştirakı ilə keçirilən təlimlərə SDU-nun müvafiq sahə üzrə təcrübəli müəllimləri təlimçi qismində cəlb olunublar. Əməkdaşlıq müqaviləsi çərçivəsində sürücülərə sərnişin daşımalarını tənzimləyən normativ-hüquqi aktlar, taksi minik avtomobilləri ilə sərnişindaşıma qaydaları, sürücü və sərnişinlərin hüquq və vəzifələri, eləcə də etik davranış qaydaları barədə təlimlər keçirilir. Qeyd edək ki, keçirilən təlimlər hər iki qurumun sosial məsuliyyətini nümayiş etdirməklə yanaşı, cəmiyyətin inkişafına töhfə vermək istiqamətində atdığı mühüm addımlardan biridir. Bu cür təlimlərin təşkil edilməsində məqsəd nəqliyyat xidmətlərinin keyfiyyətinin yüksəlməsinə, sürücülərin peşəkar bacarıqlarının artırılmasına və sərnişin məmnuniyyətinin təmin edilməsidir Təlimlərin sonunda sürücülərin Dövlət İmtahan Mərkəzi tərəfindən keçirilən “Taksi minik avtomobillərinin sürücülərinin etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlığın qiymətləndirilməsi üzrə test imtahanı”nda iştirak etmələri üçün dəstək veriləcək.