Dekabrın 3-də "Premier Works" MMC və Sumqayıt Dövlət Universitetinin birgə təşəbbüsü ilə “Turizm və otelçilik sahəsi üzrə karyera imkanları” adlı təlim keçirilib. Təlimdə "Premier Works" MMC-nin təsisçisi, direktoru Əli Həmzə Babazadə, şirkətin ofis meneceri Sura Rəhbəri, universitetin məzun və tələbələri iştirak ediblər. Karyera və Məzunlarla İş Mərkəzinin əməkdaşı Ülkər Vəlizadə çıxış edərək təlimin əhəmiyyətindən və turizm sahəsinin dünyanın iqtisadi, mədəni və sosial həyatında oynadığı mühüm roldan danışıb. Qeyd edib ki, təlimin keçirilməsində məqsəd məzun və tələbələrin turizm sahəsi üzrə əmək bazarına inteqrasiyasına kömək göstərməkdir. O, sözü bu sahə üzrə geniş təcrübəyə malik olan “Premier Works” MMC-nin təsisçisi və direktoru Əli Həmzə Babazadəyə verdi. Spiker Əli Həmzə Babazadə iştirakçılara rəhbərlik etdiyi şirkətin fəaliyyət prinsipləri, mehmanxanalar, turizm və otelçilik sektorunda mövcud əmək bazarı barədə ətraflı məlumat verib. O, həmçinin Türkiyə və TOP Avropa ölkələrində turizm sektorunda çalışmaq istəyənlər üçün karyera imkanlarından, əmək haqqı, iş saatları və digər mühüm məsələlərdən danışıb, iştirakçıların suallarını cavablandırıb. Spiker bu sahədə uğur qazanmaq üçün tələbələrin dil biliklərini inkişaf etdirmələrinin vacibliyini xüsusi olaraq vurğulayıb. Sonra “Premier Works” MMC-nin vasitəsi ilə Türkiyədə otelçilik sektorunda çalışmış Orxan Səmədzadə və Lətifə Əhmədova çıxış edərək Türkiyədə oteldə işləmə təcrübələri və iş prosesləri barədə məlumat veriblər.