Sumqayıt Dövlət Universitetində Mükəmməllik Mərkəzinin nəzdində Debat Klubunun təşkilatçılığı və Tələbə Həmkarlar İttifaqı Komitəsinin dəstəyi ilə "Yaşıl Dünya Naminə Həmrəylik İli"nə həsr olunmuş "Ölkələrin yaşıl enerji mənbələrinin istifadəsinə keçidi ekoloji problemlərlə mübarizədə ən effektiv rola sahibdir" mövzusunda VIII Debat natiqlik turniri keçirilmişdir. Turnirdə 20 komanda iştirak edib. Hər komanda mövzu üzrə öz arqumentlərini təqdim edərək digər komandalara qarşı debat etmişdir. Turnirin ilkin mərhələlərində göstərdikləri uğurlu çıxışlarla Təbiət elmləri fakültəsinin "Simpsonlar" və İqtisadiyyat və idarəetmə fakültəsinin "Əks Tərəf" komandaları final mərhələsinə vəsiqə qazanmışdır. "Simpsonlar" komandasının 1-ci spikeri Ağahüseyn Haşımov, 2-ci spikeri Nigar Əlizadə, 3-cü spikeri isə Lamiyə Abdullayeva, "Əks Tərəf" komandasının 1-ci spikeri Nəzrin Əmirli, 2-ci spikeri Səidə Mehrəliyeva, 3-cü spikeri isə Fatimə Tağıyeva olmuşdur. Turnirin final mərhələsi 30 noyabr 2024-cü il tarixində keçirilmişdir. Gərgin keçən mübarizədə hər iki komanda öz arqumentləri ilə mövzuya fərqli yanaşmalar təqdim edərək böyük maraq doğurmuşdur. Nəticədə "Simpsonlar" komandası çempion adını qazanmışdır. Turnirdə iştirak edən ən yaxşı 14 natiq və qalib komanda mükafatlandırılmışdır.