Bu il 25 – 30 noyabr tarixləri arasında Şimali Qafqaz Federal Universitetinin tələbələri Sumqayıt Dövlət Universitetində (SDU) səfərdə oldular. Bu səfər çərçivəsində tələbələr müxtəlif elmi, mədəni və tədris tədbirlərində iştirak edərək Azərbaycanla daha yaxından tanış oldular. Səfər müddətində tələbələr həm Sumqayıt şəhərində, həm də Bakıda müxtəlif mədəniyyət və təhsil müəssisələrini ziyarət etdilər. Bakının tarixi yerləri ilə tanış oldular, həmçinin Sumqayıtın inkişafı ilə bağlı məlumatlar əldə etdilər. Bununla yanaşı, tələbələr universitetimizin təşkil etdiyi müxtəlif tədbirlərdə iştirak etdilər. Onlar "İnnovativ Layihələrə Giriş" adlı tədbirə qoşuldular, müxtəlif informasiya texnologiyaları sahəsində təşkil olunan sessiyalarda iştirak etdilər və universitetin Mükəmməllik Mərkəzində, eləcə də digər mərkəzlərdə olub, burada təhsil və elmi tədqiqatlar haqqında ətraflı məlumat aldılar. Bu tədbirlər iştirakçılara yalnız tədris sahəsində deyil, həm də müxtəlif mədəniyyətlər və xalqlar arasında qarşılıqlı anlaşma və əməkdaşlıq mövzusunda dərin təsəvvürlər yaratdı. Sumqayıt Dövlət Universitetinin rektoru, dosent Rüfət Əzizov səfər çərçivəsində təşkil olunan tədbirlərdə iştirak edən tələbələrə sertifikatlar təqdim edərək, beynəlxalq əməkdaşlığın universitet üçün böyük əhəmiyyət kəsb etdiyini vurğuladı. Rektor, beynəlxalq əlaqələrin inkişafının təhsil mühitini zənginləşdirəcəyini və yeni imkanlar yaradacağına inandığını bildirdi. Səfərdə iştirak edən Şimali Qafqaz Federal Universitetinin tələbələri öz təəssüratlarını bölüşərək, keçirilən tədbirlərdən və Azərbaycan mədəniyyəti ilə tanışlıqdan çox məmnun olduqlarını qeyd etdilər. Onlar həmçinin, bu cür beynəlxalq layihələrin onların şəxsi və peşəkar inkişaflarına müsbət təsir etdiyini söylədilər.