Oktyabrın 28-də Elm və Təhsil Nazirliyi, İnnovasiya və Rəqəmsal İnkişaf Agentliyinin birgə təşkilatçılığı, “Code Academy” nin tərəfdaşlığı ilə "Code For Future" layihəsi çərçivəsində Sumqayıt Dövlət Univesitetinin (SDU) tələbələri üçün məzun günü keçirilib. Məzun gününü giriş sözü ilə layihənin baş koordinatoru Asiya Rüstəmova açaraq “Code for Future" layihəsinin tələbələr üçün əhəmiyyətini vurğulayıb. Təqdimatla çıxış edən baş koordinator layihə çərçivəsində ötən semestrin nəticələri və növbəti semester üçün nəzərdə tutulan işlər barədə məlumat verib, həmçinin payız – yaz semestri ərzində İnformasiya Texnologiyaları və Proqramlaşdırma üzrə təhsilini başa vurmuş məzunları təbrik edib. Tədbirdə Elm və Ali Təhsil üzrə Dövlət Agentliyində Qiymətləndirmə və Monitorinq Departamentinin baş analitiki Namiq Nəsibov çıxış edərək İT sahəsi üzrə gənclərin biliklərinin artırılması, bacarıqlarının inkişaf etdirilməsi və gələcək karyeralarında bu kimi layihələrin önəmini qeyd edib. SDU-nun Elm və innovasiyalar üzrə prorektoru dosent Elşad Abdullayev bu münasibətlə məzunları ürəkdən təbrik edib, əmək bazarında peşəkar kadrlara hər zaman böyük ehtiyacın olduğunu qeyd edərək “Code Academy”dən faydalanmağı tövsiyə edib. Sonra “Code For Future" layihəsinin müəllimləri Rəmzi Məmmədli və Fidan Məmmədova çıxış edərək layihəni uğurla tamamlandıqlarına görə bir daha məzunları təbrik edib və onlar ilə qürur duyduqlarını diqqətə çatdırıblar. Sonda layihənin məzunu olan SDU tələbələrinə diplom və sertifikatlar təqdim edilib.